肉蒲團上畫前夕 3D數碼勁升17％

【明報專訊】中國3D數碼（8078）出品嘅電影《3D肉蒲團》今日上映，觀眾似乎好受落呢套三級片，小琴睇到預訂反應不俗，UA朗豪坊同百老匯The ONE，今日都安排咗13場放映。三級片唔再係男士專利，連女士都吸引入場，UA院線特別安排周五有兩場女士專場，預訂已經滿咗九成。

電影未上映已經有咁多話題，中國3D數碼嘅股價噚日升左17％，收報0.061元。不過呢隻股股價大上大落，3月24日上到半年高位0.123元，之後一直插水，近日先有番啲起色。有業內人士話，近年三級片中以2007年梁朝偉、湯唯主演嘅《色，戒》較轟動，本港票房收3000幾萬，成為香港三級片嘅票房榜首。色，戒喺內地禁播，好多內地自由行旅客嚟香港旅遊兼睇戲。3D肉蒲團率先喺香港播放，睇吓有冇機會成為內地旅客嘅「觀光點」。