星爺：難搵似我嘅天才導演

【明報專訊】比高集團（8220）伙中華影業進軍內地戲院業，噚日舉行記者會，當然唔少得大股東「星爺」周星馳出席，講開比高未來的發展方向，星爺就一貫佢嘅風趣幽默，話好似佢咁嘅天才導演可遇不可求！

開初星爺都一本正經咁回答記者問題，話公司發展有3大方向，包括電影製作、電影衍生產品以及新發展嘅戲院業務，當講到電影製作的時候，佢就話：「未來重點業務會係戲院業，但都會繼續做電影製作嘅，不過大家都知啦，有潛質嘅天才導演呢……即係好似我咁，都好難搵到㗎。」

分析員捧場 財記坐後排

唔知係咪星爺嘅幽默作風會傳染，噚日執行董事陳昌義講到公司集資計劃嘅時候，都學咗星爺嘅口吻：「公司係有集資計劃，集資方法來來去去都係嗰幾樣，邊幾樣？咪嗰幾樣囉。」

不過，講開又講，噚日新聞發布會係邀請咗財經記者同分析員一齊來，唔知公司係咪怕記者朋友嚇親星爺，安排記者只可以坐喺最後一排，搞到一班記者只可遠觀星爺風采。臨尾有記者問星爺係咪好怕財經記者，佢就大大聲咁話「唔係！」，然後就由特別通道走人。

報料電郵﹕piano@mingpao.com