寶哥哥獲小股東讚不絕口

【明報專訊】東亞（0023）主席兼行政總裁李國寶近日可謂喜事重重，除咗二公子李民斌嘅麟兒Jonathan喺3月底出世，為寶哥哥增添首位男孫，以及大公子李民橋盛傳將於5月再婚之外，喺噚日嘅東亞股東大會上，發言嘅股東都對東亞讚賞有加，更有小股東要求行將退休嘅寶哥哥「最好做耐啲」，能夠得到股東嘅肯定，難怪佢噚日全程笑容滿面啦。

同過去兩年相比，今年東亞嘅股東大會氣氛明顯和諧好多，皆因東亞舊年盈利錄得record high，股價亦持續喺30蚊樓上，所以，噚日再無股東表達不滿，反而有小股東為寶哥哥往年喺股東大會上捱轟嘅遭遇抱不平，「你為香港做咗好多嘢，以你咁有才華，如果喺其他公司做，肯定唔止收幾千萬（薪酬）。」

三年任期將過 小股東挽留

亦有小股東關心已屆七旬嘅寶哥哥何時退休，不過，寶哥哥依舊無正面回應，只係拋下一句「呢個要問董事會」。

小琴就記得，寶哥哥喺09年講過，自己任期獲董事會延長3年，即係話如無意外，佢會喺出年退下來。

至於國浩會否繼續增持東亞，亦繼續成為小股東焦點。寶哥哥回應指，國浩目前持有10.06%東亞股份，強調同國浩「好熟吓」，並形容對方為被動投資者。

聯交所資料顯示，喺4月14日，寶哥哥喺東亞既持股量，由原來嘅2.81%，進一步升至2.85%，涉及嘅88萬股股份屬於紅股，另有5名東亞嘅董事亦同樣選擇咗以股代息。

報料電郵﹕piano@mingpao.com