內地全職太太 晉身富豪級

【明報專訊】香港仲講緊家庭主婦嘅福利保障受忽視時，大陸嘅全職太太就入圍做冒起中嘅千萬富豪，可投資資產超過1000萬元人民幣，同大陸藝人、運動明星齊名，認真巴閉。

招商銀行嘅「中國私人財富報告」調查，過千萬身家嘅人列為「高淨值」，呢批人由2009年41萬人，到2010年增加到50萬人。最多千萬富豪嘅5個省市包括﹕廣東、上海、北京、浙江同江蘇。呢啲千萬富豪主要係企業主管、專業投資者，而冒起中嘅包括全職太太、退休人士、演藝及體育明星，約佔整體一成。

調查又發現，呢批千萬富豪有六成會考慮，或者已經成為投資移民，移民首要原因過半數為子女教育，而為咗多生子女約佔6％。報告又指過去兩年大陸境外投資增長迅速，資產規模成倍增長，當中有一半以上資產嚟咗香港。