比亞迪業績倒退 王傳福人工照加

【明報專訊】去年盈利大倒退的比亞迪（1211）真係今時唔同往日，上個月先賣出4萬架左右嘅汽車，比去年同期跌咗四成。雖然講得好聽少少就係相比2月嘅2.6萬架銷量，升咗差唔多一半，但好大原因係因為佢哋宣布汽車減價促銷所致。連埋1月份同比跌15%嘅5.2萬架銷量，比亞迪今年首季業績真係難被睇好。

年薪加17% 至401萬

公司業績走下坡，但係佢哋主席王傳福嘅人工偏偏繼續有得加，昨日佢哋公布既年報就披露王傳福去年嘅薪酬已經由09年嘅342萬元（人民幣．下同）加到去401萬元，升成17%仲高過通脹。但另外兩位同佢一齊創辦比亞迪嘅非執行董事呂向陽及夏佐全，都仲係繼續拎15萬薪酬，仲好似兩三年冇加過添。

講真，08年金融海嘯之後，全球汽車業陷困境，獲股神巴菲特入股嘅比亞迪做咗逆市奇葩，王傳福更做埋09年福布斯中國富豪榜首富。但係今年中國取消一系列買車優惠政策，加上北京限車令同油價上漲，搞到市民唔敢買車；就連比亞迪響陝西省買塊地開廠房都涉及違規，睇嚟王傳福真係應該好好想吓點樣拉動公司成績，而唔係拉動自己薪酬。

報料電郵﹕piano@mingpao.com