3Q大戰 騰訊先贏一仗

【明報專訊】騰訊QQ同奇虎360嘅「3Q大戰」擾攘多時，之前仲畀工信部點名批評要向網民道歉，而騰訊同奇虎就互相入稟法院控告對方，喺呢場大戰裏面，噚日騰訊就取得階段性勝利。

須連續30日登澄清聲明

騰訊起訴奇虎360不正當競爭案噚日宣判，奇虎360被判損害騰訊嘅商業信譽，要賠償騰訊40萬元（人民幣•下同）。北京市朝陽區法院裁定，奇虎360對騰訊構成商業詆譭，奇虎360除咗要賠償騰訊40萬元之外，仲要連續30日刊登聲明，消除為騰訊帶來嘅不利影響。正所謂錢銀事小，面子事大，區區40萬元相信對奇虎360都係好濕碎，不過要連續30日刊登聲明，好明顯就有損面子啦。

騰訊原本起訴時要求對方賠償400萬元，法院就裁決為40萬元。騰訊就話，該40萬元會捐給公益慈善基金會，仲話會繼續保護用戶安全。

另一官司﹕奇虎控騰訊揑造事實

不過，大戰仲未完結，奇虎360與騰訊之間仲有另一單官司，係奇虎360起訴騰訊在網站上揑造360瀏覽器涉嫌色情推廣的事實，詆譭奇虎360公司名譽。

成件事嘅由來係在去年9月，奇虎360公開指摘騰訊QQ軟件掃描用戶硬盤，侵犯用戶隱私，之後推出一款360隱私保護器，監測騰訊軟件的掃描行為。騰訊就要求用戶喺QQ同360之間二選一，令用戶強烈不滿，最後要由官方出面調解先至平息。