郭炳湘另起爐灶搞慈善

【明報專訊】新鴻基地產（0016）非執行董事郭炳湘今勻真係另起爐灶，呢單生意仲可能愈做愈大，涉及好多人利益。大家唔好誤會，郭氏大哥唔係同家族公司爭生意，而係自設慈善基金公司搞公益活動。郭炳湘話，以往佢透過家族嘅慈善基金公司參與公益，宜家有自己嘅「地盤」，發揮空間更大。

成立新慈善基金 未定注資額

小琴發現郭炳湘兩個星期前，註冊咗一間新慈善基金公司，名為「Walter Kwok Foundation Limited」，用番自己英文名。發言人回應小琴查詢，證實係郭炳湘用來搞慈善的新公司，並轉述阿湘話，公司啱啱成立，仲未決定注資幾多錢入去，主力會做慈善項目。郭氏家族本身都成立咗好多慈善基金，例如：新鴻基地產郭氏基金有限公司、新鴻基地產慈善基金有限公司等。郭炳湘解釋，如果家族基金認為某些慈善項目不太合適，而郭炳湘個人又覺得值得支持嘅話，佢就可以用個人基金支持。佢話家族基金會有優先權揀選適合嘅慈善項目，佢唔會爭住做。

家族基金揀項目有優先權

睇番新地兩個基金，新鴻基郭氏基金由上市公司、家族合共捐出10億元運作，主要捐助教育、文化及文物項目，受助單位好多屬於內地大學。另一個新鴻基地產慈善基金隸屬上市公司，捐助體育、文化、學術、社區等，以香港為主。為善最樂，大家都歡迎慈善基金愈多愈好。

報料電郵﹕piano@mingpao.com