慈善基金擁富豪御用管理人

【明報專訊】講起搞慈善基金，小琴介紹大家認識一位金牌管理人王啟達，佢除左幫郭炳湘設立慈善基金，出任Walter Kwok Foundation呢間新公司的董事外，仲喺「四叔」李兆基發起創辦嘅香港培華教育基金會，擔任常務委員，而香港著名慈善家方樹泉兒子方潤華設立嘅基金，都搵左王啟達做董事。

王啟達係會計師出身，佢同小琴講，唔少人有錢人希望回饋社會，設立慈善基金。不過，做善事唔止拎筆錢出嚟咁簡單，好似做生意咁，要識得管理，例如：點揀捐助嘅對象？捐助教育抑或醫療好啲？想做長期定係短期項目？點樣肯定資源運用喺適合地方？全部都大有學問。家好多慈善項目喺內地進行，但人民幣不斷升值，點樣令基金增值、保值，唔好虧本，都要處理恰當。

王啟達以現任中文大學聯合書院基金會委員嘅工作為例，書院設立左一筆基金作獎學金。佢哋要諗辦法，點樣令基金「錢搵錢」，唔好用到一毫子都冇。王啟達累積慈善基金運作經驗，好多人搵佢幫手，佢話當做義工，自己都可以參與慈善。早前四叔參加清華大學百周年活動，捐助3億元建教學大樓，王啟達都以培華教育基金會名義隨團出發。