高盛烏輪2.0 全日零成交

【明報專訊】高盛「烏輪」事件搞出一個大頭佛，最新進展就係，由接近30個投資者組成嘅關注組，噚日由立法會議員涂謹申做代表，連同8位投資者緊急約見港交所（0388）行政總裁李小加，據講關注組已向李小加提出初部反建議，不過阿涂就直言唔係好滿意會面結果，話希望港交所可以作出多啲承諾喎。

其實市場對於高盛個方案有幾「滿意」，睇吓尋日高盛上市果4隻日經輪就知。事緣高盛回購方案其中一部分，就係根據「正確程式」重新發行4隻條款同無限期停賽的4隻烏輪一樣嘅窩輪，分別係兩隻Call兩隻Put。呢4隻「日經烏輪2.0」噚日應市，但成日一個成交都冇，完全無人問津。有業內人士好抵死咁話，經此一役，有投資者敢幫趁呢間投行買輪至奇！

回購方案條件 散戶驚驚

小琴都有同某啲關注組成員傾過，佢哋的確對高盛失晒信心，例如高盛同港交所都曾經講過，散戶接受回購方案之餘可保留法律追究權利，但佢哋研究完回購方案文件上面嘅條款之後，覺得其中第9點有關投資者簽字，即係「acknowledges the Issuer's view」（知道發行人的立場），擔心收咗錢就要放棄法律追究權利。小琴攞住份文件問過一啲法律界人士，佢哋就話「acknowledges」嘅意思只係「知悉」，唔等於「認同」，所以唔代表放棄追究權利。有口痕友又話，睇嚟呢班投資者由最初嘅「憤怒鳥」變晒做「驚弓之鳥」。

報料電郵﹕piano@mingpao.com