葉澍堃任米蘭站非執董

【明報專訊】OL至愛嘅米蘭站在港上市進行得如火如荼之際，招股書就披露前經濟發展及勞工局長葉澍堃擔任米蘭站嘅非執董，之前葉澍堃已經係5間上市公司嘅非執董，不過佢嘅退休生活一向多姿多采，今次貫徹佢百足咁多爪嘅作風，成為第6間上市公司嘅非執董。

除咗米蘭站之外，葉澍堃仲係太益（0686）、華潤水泥（1313）、麗新發展（0488）、新昌管理（2340）同埋李寧嘅財技公司非凡中國（8032）嘅非執董，計落去年都咗58萬人工，其中新昌就最闊佬，有20萬嘅年薪畀葉澍堃。

已身兼5間公司職 舊年58萬

其實唔少高官退咗休幾年後，都會心思思出番嚟做上市公司嘅非執董，由於退休高官有名望，上市公司亦好樂意邀請佢哋，好似前金管局總裁任志剛咁，2009年退休時，任總話要先休息一下，最終去年接受咗瑞銀招手做獨立非執董，年薪有成242萬元，之後仲做咗建行（0939）同德昌電機（179）嘅非執董職位添。

退休後活躍於商界嘅前高官，仲有前規劃環境地政局長蕭炯柱，以及前財經事務及庫務局長馬時亨，其中馬時亨出任3間上市公司非執董，包括擔任中策（0235）嘅非執行主席，年薪就達到350萬元，以及啱啱上個月先落實嘅農行（1288）非執董。而蕭炯柱就係電視廣播（0511）、華創（0291）同載通（0062）嘅非執董。

不過，唔係個個高官都做咁多間上市公司嘅職務，好似前財爺梁錦松，身為百仕通集團大中華區主席，就只係出任工行（1398）一間上市公司嘅非執董。

報料電郵﹕[email protected]