鍾馨稼沽雷天賺3億

【明報專訊】中聚雷天（0729）股東鬧內鬨已經唔係新聞，聯交所資料噚日就顯示，關鍵人物發明家鍾馨稼上個禮拜用0.51元沽咗9.1億股套現。小琴噚日搵到鍾博士，佢話上個禮拜沽嗰批股票，係用手上CB（可換股債券）兌換返嚟，即日賺咗2.8億，佢仲話除咗CB之外，自己手上一股中聚都未沽過，亦無興趣沽，咁講法兩邊股東似乎仲有排鬥喎。

兌換換股債 未沽手持股票

根據資料，鍾博士上個月29號用每股0.51元，響場內賣咗9.1億股股份，套現咗4.64億港紙，佢話手上嘅股份一股都未賣過，上個禮拜賣嘅都係用CB換返黎嘅股份，睇返嗰批CB換股價係每股2毫，即係話佢呢次沽貨即時帳面賺2.8億，鍾博士就話呢次沽貨唔係佢意思，係佢啲財務顧問同律師嘅主意，至於仲會唔會再沽手上嘅CB，佢就話交畀顧問佢哋話事喎。

雖然鍾博士家響中聚已經無任何職位，但佢話佢家仲係中聚大股東，雖然唔知會唔會再沽CB，但佢話家使用環保電動車係全球大趨勢，中聚仲係用佢嘅技術生產，前景好明朗，所以短期內就無意思沽手上嘅股份。咁搞法，睇怕佢同公司方面可能仲有排鬥喎。