國泰再有華人總裁？

【明報專訊】史樂山由國泰（0293）常務總裁升任到行政總裁，常務總裁就由朱國樑接任。朱國樑會唔會有機會問鼎行政總裁，繼陳南祿之後，再出現中國人面孔？史樂山昨日會晤傳媒時，話唔知道將來安排，但就力讚朱國樑係出色嘅管理層，朱國樑曾派駐內地、台灣、東南亞地區，睇嚟佢嘅工作經驗同國泰未來中國發展路向非常配合，仕途能否更上一層樓，未來幾年會揭盅。而首位華人行政總裁陳南祿，任期由2004年至2007年。

國泰航空喺本港起家，同機管局合作無間。史樂山噚日提到，記得幾年前提出將國泰同港龍嘅機場嘅櫃位搬近啲，方便工作，機管局立即安排搬遷。

不過，史樂山發現調動後，反而令乘客更唔方便，因為國泰同港龍嘅乘客太多，迫埋一齊辦理登機手續，之後又會集中去最接近櫃位嘅閘口登機，另一閘口就拍蒼蠅。國泰於是建議還原，將國泰及港龍櫃位分開。史樂山話機管局從善如流，幫佢哋恢復原狀。而國泰早前要加建貴賓室，機管局都幫佢哋搵擴充。史樂山盛讚機管局體貼，希望機管局今年研究機場停泊費時，都考慮吓航空業今年營運成本上漲，繼續體貼航空公司，唔好加咁多。