四叔引「上善若水」勸捐

【明報專訊】四叔李兆基上個禮拜去咗北京，出席清華大學百周年嘅一系列活動。佢老人家捐出3億元人仔，喺清華起李兆基科技大樓。就喺清華百周年校慶捐獻答謝宴上，見到人大副委員長華建敏，四叔話佢特別同華建敏講咗佢嘅志願「上善若水」呢4個字係乜意思。

大家可能聽過出自老子《道德經》的金句「上善若水」，翻查解釋，係講真正偉大的善行會如水一樣，潤澤萬物而不與人起爭端。四叔就有一個對香港人嚟講更加傳神的演繹，噚日四叔喺培華基金嘅傳媒宴中話，當晚佢見到華建敏，就講到「上善若水」除咗指水灌溉萬物之外，廣東話嘅「水」即係「錢」，「冇水」就唔能夠生存，「有水」就生，「冇水」就唔掂，所以「有水之人」，就應該好似佢老人家咁，出來多捐錢。

原來四叔都係清華大學名譽校董及戰略發展顧問。捐番幾億支持下，可以話係四叔身體力行實踐「上善若水」。

講開培華基金，四叔29年前同方潤華、霍英東同鄭裕彤等一同創立，多年來一直培訓內地省市官員。四叔話上個禮拜去開北京，亦順道去埋內蒙古巡視自己嘅投資。見到自治區主席巴特爾，對方話畀佢知，原來早在1995年，曾經係培華嘅學生，今日成為自治區主席，自然好感激培華嘅幫助。

快將再抱孫 員工利市「隨意啦」

四叔兩個月後又會抱孫，李家誠、徐子淇兩夫婦將會首嚐弄璋之喜。問四叔今次會唔會再向員工大派1萬元大利市，佢只係答了一句﹕「隨意啦。」

報料電郵﹕piano@mingpao.com