新聞類別
財經
詳情#
【明報專訊】香港上市公司近年嘅業務愈來愈五花八門，但勢估唔到連腳底按摩店都話要嚟上市。小琴噚日就睇到內地報道，連鎖按摩店重慶富僑為咗衝出重慶要嚟香港上市，仲打算今個月喺香港尖沙嘴開第一間海外分店，不過因為香港開舖皮費好重，搞到收費都要貴內地1倍喎。
富僑喺內地都算出名，家全國直營店同加盟店數量超過600間，富僑副總裁張三政話，佢哋已經決定咗要去香港上市，為咗令投資者可以更加了解業務模式，佢哋已經中聯辦旗下嘅新家園協會搞咗間合營公司，未來10年會投資1980萬美金（約1.54億港元）喺香港開10間直營店，其中富僑會佔1000萬美金。
首家海外店 落戶尖沙嘴
富僑已經喺尖沙嘴摩地道租咗舖，第一間分店會喺呢個月開幕，除咗少數人員外，香港分店所有員工都會喺香港招聘，不過，張三政話，香港開舖成本比重慶高得多，淨係每個月租金已係重慶嘅10倍，員工每個月要成2萬蚊，係重慶嘅8倍，裝修成本仲要成700萬，你都咪話唔「那利」。
香港收費 貴重慶一倍
小琴喺香港間唔中都會幫趁吓按摩店，皮費咁高，富僑香港舖梗係要加價，每45分收費要成180至200蚊，同小琴平時見到嘅差不多，不過，同佢哋重慶分店比較就差得遠，按摩90分鐘只不過係78元人仔！
據上個禮拜先至去過重慶嘅好友說，因為富僑有唔少係加盟店，質素良莠不齊。好似佢上個禮拜的經驗，足足乾等45分鐘才輪到佢享受足浴服務，雖然收費比香港平一大截，但都唔係好滿意。希望富僑嚟香港開店時，要記住港人好繁忙，唔得閒等咁耐。
報料電郵﹕piano@mingpao.com
回應 (0)
