蔡冠深蒙德揚 齊撐報紙

【明報專訊】噚日香港報業公會頒獎禮，新華集團主席蔡冠深夫婦、信興集團副主席蒙德揚齊齊出席兼贊助大會獎項。蔡氏夫婦話記者嘅工作對社會好重要，帶嚟重要嘅資訊。而做電器嘅蒙德揚話即使科技發達，互聯網、iPad、手提電話都可以睇到報紙，但佢依然鍾意攞住份報紙揭嚟揭去咁睇，繼續做傳統報紙嘅忠實粉絲。

新華同信興兩位老細除左支持傳媒外，仲有個共通點，就係生意同日本有關。新華業務多多，其中一項係入口海產，而蔡冠深鍾意食日本菜，仲特別喺尖沙嘴開咗間日式餐廳西村。日本地震引發核輻射危機，食物受輻射影響，出口量減少，好多日式餐廳都叫苦連天。

小琴問蔡冠深生意影響如何？佢話餐廳屬小型食肆，對集團整體生意只佔小部分。佢哋亦都選擇喺安全嘅地區入口食材，佢仲話請小琴去餐廳大快朵頤，身體力行支持日本復蘇。

信興生產線 亦受地震影響

而信興銷售Pansonic、JVC等日本牌子電器，有唔少電器嘅零件嚟自日本，副主席蒙德揚都話日本地震後，零件供應首當其衝減少，對生產線運作都有少許影響。香港人衣、食同日本關係密切，睇嚟311地震嘅影響仲未完。