國產facebook美上市

【明報專訊】社交網站facebook喺香港可以話無人不曉，每日喺港鐵入面攞住部「唉風」篤篤篤啲後生仔，十個有九個都玩緊Facebook。國產版（或曰「山寨版」）facebook──「人人網」聽講喺內地都好hit，hit到早兩日去埋紐約上市，首日掛牌仲一度狂升七成。

首日掛牌一度升七成

雖然呢隻人人網上市前備受質疑，話佢估值仲高過「正版」嘅facebook一大截，好多財務數據嘅可靠性又存疑，不過觀乎佢上市後嘅表現，大家都無話可說。小琴就發現，由招商局集團做大股東嘅招商局中國基金（0133），原來都獨具慧眼，透過一間合營公司喺人人網投資咗1100萬美元，實際持有78.5萬份美國預託證券，市值超過1400萬美元。

睇返呢間招商局中國基金，佢哋主要業務喺中國直接參股非上市企業，根據佢哋舊年啲年報，招商局中國基金嘅投資組合都好多元化，由一般金融、文化業務以至同體育有關的NBA中國都有，今次沾手熱爆嘅社交網站，唔知最終可唔可以勁賺一筆呢。