李小加八色鳥花樽贈記協

【明報專訊】港交所（0388）行政總裁李小加將會出席本月20日舉行嘅香港記者協會周年晚會，擔任主禮嘉賓，佢仲送咗個靚花樽畀記協拍賣。記協收到呢個靚花瓶，除咗要物色一位識貨之人，仲諗緊送咩回禮畀李小加。小琴聽聞李小加好鍾意足球活動，記協可能要向呢方面諗諗。

講番呢個花樽名為「翠彩精靈」（Bamboo Song Bird），睇落好別致，花樽旁邊有幾隻彩雀活靈活現飛舞，呢款雀名為八色鳥，屬於亞熱帶地區嘅候鳥。佢哋棲息嘅地方同人類活動環境太過接近，所以瀕臨絕種，只有台灣、日本同韓國搵到佢哋蹤影。而花樽嘅製作方法亦與別不同，由法藍瓷（Franz）製作，將東方同西方藝術結合。記協會用暗標形式競投，價高者得，款項用作記協經費。如果對呢個花樽有興趣，不妨向記協了解。

暗標競投 得款作記協經費

李小加送出呢個私人珍藏，記協當然要回禮啦，據講，佢哋諗過同運動有關嘅禮物，例如﹕運動鞋、運動衫等，因為年初見到李小加跑渣打馬拉松兩公里商界組，跑完仲精神奕奕，相信佢運動了得。小琴就八到李小加對足球更有興趣，記協每年都舉辦記者足球比賽，下次可以邀請李小加踢番場友誼賽，可能更啱佢心水。

報料電郵﹕piano@mingpao.com