永恒唔怕盈警 4億買寶石店

【明報專訊】自由行來港消費力強勁，珠寶店、金飾店成為遊客來港必到景點。做開珠寶批發嘅永恒國際（8351），就用4億元收購咗老牌Larry Jewelry俊文寶石店，加強零售業務。

呢單收購其中2.5億元要畀現金，不過，市值12.53億嘅永恒今個月先發完盈警，現時冇負債，手上現金6000萬元，非執行董事嚴國文話冇有怕，考慮引入策略投資者同向銀行融資完成交易。佢又解釋盈警涉及一批認股權，並唔影響現金流。Larry有44年歷史，喺香港有3間分店，新加坡有兩間，一直由家族3兄弟打理。嚴國文話佢哋已經60、70歲，家族第二代冇考慮接棒，加上永恒誠意打動，答應將俊文寶石店擴展到大陸市場，成功斟掂呢次交易。嚴國文話4億元中，存貨同商譽分別2.5億元及1.5億元。