永利想變身中國公司？

【明報專訊】美國漫畫經典人物超人早排宣布放棄美國國籍，以顯示佢追求正義之心無分國界。無獨有偶，喺美國拉斯維加斯起家嘅賭業巨擘永利，都話自己係中國公司多過係美國公司，唔通佢都想效法超人放眼世界？

話說永利澳門（1128）主席史提芬．永利噚日喺澳門永利酒店主持公司嘅股東會，會後見記者劈頭就話，永利澳門母公司，即係美國上市嘅Wynn Resorts，都喺澳門舉行周年會議，係因為集團近排愈來愈覺得，永利喺好多方面都係一間中國公司，從公司收入可見一斑。

雖然史提芬永利表明佢一顆「中國心」，不過銀娛（0027）嘅澳門銀河前兩日開幕，不少芬佬同分析員就擔心永利會首當其衝，因為佢同銀娛啲疊碼仔有所重複，好大機會被澳門銀河攤薄客源。史提芬．永利聞言就自爆去過澳門銀河兩次，一次係開幕前去「刺探軍情」，另一次就係澳門銀河開幕個慶祝晚宴。

有美國人的公關手段

史提芬．永利又話要恭喜呂志和同呂耀東，大讚呢個項目做得好好，對澳門長遠而言有貢獻，雖則同行如敵國，佢哋都好高興對方做得咁好，可以鞭策永利再做好啲咁喎。小琴記得，呢位美國人喺賭王何鴻燊新場開幕時都講過類似嘅說話，果然好貫徹佢啲美式公關手法喎！

報料電郵﹕piano@mingpao.com