匯控投行部 首次喺北京開會

【明報專訊】匯豐控股（0005）呢排個個高層都要周圍飛相當繁忙，好似今日集團負責投行業務嘅三十幾個環球銀行部高層，就展開一連兩日嘅會議，不過呢班阿頭周圍飛去開會都不足為奇，出奇在今次佢哋揀咗喺北京開會，聽講係第一次投行部喺內地開會呢！

同行嘅環球銀行及資本市場亞太區主管馮婉眉，唔知會唔會一盡中國人嘅地主之誼，帶住呢班主要以外國人為主嘅同事喺北京玩吓呢？雖然今次開會係以各個主管匯報工作為主，不過小琴當然希望呢班投行Banker，可以諗吓點樣加快匯控喺內地上市掛牌，或者完成行政總裁歐智華心願之一，喺內地搵到合營伙伴一齊搞證券生意。

歐智華周四亮相

話時話，歐智華上個星期喺倫敦大講未來策略及執掌匯控嘅抱負，今個星期四就會同各位小股東見面，不過，佢晨早已飛返嚟香港，今日仲會出席一個欖球活動。