新聞類別
財經
詳情#
【明報專訊】即將喺本月28日舉行的股東周年大會上正式退任嘅匯控（0005）執行董事鄭海泉，噚日現身匯控非正式股東大會上，仲同新上任嘅集團主席范智廉及集團行政總裁歐智華一同列席台上。臨別依依，少不免都要講吓感言，鄭海泉就話，匯控係一個很好的集團，離開係個困難的決定。
現年62歲嘅鄭海泉，退任後唔再尋求連任，轉為擔任匯控顧問工作。作為首位華人大班兼匯豐劃時代人物，大家都希望聽多啲鄭海泉嘅心底話，不過，為免喧賓奪主，佢只係簡潔講咗幾句，「好榮幸喺匯控做咗33年，同埋俾咗好機會我，不單只令我可以養妻活兒，亦都更加係令我喺金融界方面學到好多嘢。」
股東會正式退休 轉任顧問
鄭海泉亦不忘寄語匯控上下要繼續努力，發揮集團嘅精神，仲話對新管理班子充滿信心，相信未來匯控會創造更多成功故事添。鄭海泉咁識做，歐智華就講笑咁話，「就算佢退休，我哋都唔會畀佢離開匯控。」歐智華透露，鄭海泉會去倫敦出席喺下周舉行嘅匯控周年大會。
舊年同匯控請咗兩個月病假嘅鄭海泉，噚日睇嚟精神十足，可能係卸任在即，心情自然輕鬆，股東大會之後特登停落嚟同傳媒閒聊一番，佢仲好友善咁同小琴握手問好，盡顯大班風範，小琴喺度祝佢退休之後生活愉快啦。
報料電郵﹕piano@mingpao.com
回應 (0)
