貿發局轉型 sell香港橋樑角色

【明報專訊】大家都知貿易發展局的主要工作，係將港商嘅產品推廣至國際市場，原來佢哋亦隨世界經濟結構變化，逐步轉型，聽該局副總裁方舜文講，歐美日趨重視出口到亞洲，及中國企業亦有「走出去」進行併購的趨勢，所以，該局日後工作嘅重點之一，係推廣香港喺呢個新潮流中扮演嘅角色。

貿發局於今年9月會喺倫敦、愛丁堡及利茲等英國城市舉行一個名為「Think Asia Think Hongkong」嘅大型推廣活動，同期更加插香港電影周，目的旨在推廣香港服務業，令歐洲企業進軍中國以至亞洲時，第一時間會諗起以香港作為橋樑。

另外，最近該局亦與江蘇省合作，帶當地企業，到美國進行併購配對，據說效果唔錯。當然，香港的會計、法律及銀行界都跟埋去，提供各類的諮詢服務。

據Margaret（方舜文嘅洋名）講，美國奧巴馬總統話要大幅提升美國嘅出口，貿發局與美國駐港總領事館合作，便加強推廣美國出口企業來香港參展，去年嘅環保展覽及今年的影視展都見美資展商參與度提高咗，在影視展上美國更設有獨立的展館，大賣美國影視製作。

睇嚟貿發局喺激變嘅世界經濟中，都要好似香港人咁，要不斷轉型。