重選董事 甘慶林反對票零舍多

【明報專訊】噚日和黃（0013）舉行周年股東大會，其實都係通過去年業績，以及重選董事呢啲例行公事。不過，小琴就發現，喺重選董事呢個項目，重選執行董事嘅甘慶林得票特別少，唔知係咪主理匯賢（87001）嘅甘慶林，因為股價潛水，而令到基金股東對佢有啲微言呢。不過照計高價售股，對和黃股東係好事，咁啲基金又唔滿意甘慶林啲乜呢？

噚日重選甘慶林為董事嘅普通議決，有一成以上投票股東票數反對，相比起其他董事成99％票數通過，的確係有啲失威，而有一成嘅反對票，照計都係一些基金股東投的。

甘慶林係全球首隻以人民幣計價的房地產信託基金匯賢，嘅主席兼非執董，係4月上市時吸引逾百個機構投資者，以及3.6萬名香港散戶認購，不過，匯賢一上市股價就潛水，掛牌首日更破底收場，收報4.75元（人民幣．下同)，較定價5.24元大跌9.35%。

上市至今匯賢仍潛水

直到噚日為止，匯賢股價都仲低過當日定價，噚日收市股價為4.6元，如果當日認購一手（1000個基金單位）嘅投資者，不計交易費用等，今日就蝕咗640元。

講開又講，小琴睇番過去2年和黃嘅股東大會紀錄，都發覺某啲董事重選嘅時候，得票會比較少，好似上年咁，重選執董陸法蘭就有13.3％反對票、重選獨立非執董梁高美懿就有14.6％反對票。至於2009年時，重選執董黎啟明就有13.8％反對票，睇來部分董事嘅表現，得唔到全部股東滿意喎。

報料電郵﹕piano@mingpao.com