李小加：派港交所股票 好過派6000蚊

【明報專訊】記者協會噚日舉行晚會，請咗港交所（0388）行政總裁李小加做主禮嘉賓，一上台就話，家全城等緊派6000蚊，而佢就覺得派港交股票好過派6000蚊喎，實行賣花讚花香咁話。之後佢仲好幽默咁講，鍾意香港記者，係因為業績公布時，佢地會好有興趣去報道，當啲攝影記者影相嘅時候，閃光燈閃下閃下，令佢覺得自己係一個荷李活明星喎。

鍾意香港記者 熱中報道

由於係記者協會嘅晚會，李小加就講咗一啲對於香港記者嘅觀感。佢話，除咗記者會嘅時候有做明星嘅感覺外，仲話香港嘅記者全部都好年輕好young，有啲記者雖然好有經驗，但外表都仲好似啱啱畢業嘅青年人，令佢好賞心悅目。而且香港記者有時會用廣東話問問題，令只識普通話嘅佢可以裝傻。

對於香港報紙嘅風格，佢就話，覺得報紙頭版成日都係廣告，而報紙嘅相，有時會用一個真人頭配上個卡通身，非常有趣咁話，咁啱噚日記協就送咗幅卡通畫畀佢，到佢好開心。

李小加噚日仲拎咗個名為「翠彩精靈」嘅花樽出來拍賣，底價係1萬蚊，最後由金利豐朱太以6.8萬投得。