富士康被指邊起邊生產

【明報專訊】內地代工業龍頭富士康（2038）及其母公司，自去年初發生員工連環跳樓自殺事件後，似乎運氣未轉好。去年因為蘋果產品大熱，搞到富士康少咗好多傳統手機代工訂單，結果去年業績巨虧2億幾美金，最近仲畀恒指剔出藍籌之列。

上星期三富士康開股東會就向小股東派定心丸，主席陳偉良更好少有咁同記者見面，仲拍晒心口保證公司今年業績一定好轉，唱好之下股價一度反彈升11％，但話口未完，成都廠房就整單杰嘢，上周五晚發生爆炸意外，仲死咗3個人，結果噚日收市跌近3%，利好變利淡。

成都廠房爆一爆唔單止炸跌富士康股價，一直關注富士康員工環境嘅民間團體——大學師生監察無良企業行動亦發出聲明，譴責富士康漠視工人職業安全健康，話曾派人去過出事廠房，廠房車間空氣唔流通，窗戶緊鎖，好易引起化學反應意外，就好似今次爆炸咁。

呢個組織仲話，富士康陸續將生產線從深圳遷往內陸城市以降低成本，成都廠房竟然只係用咗76日就已經「竣工」，明顯係因為急於投產，所以佢地調查時，發現嗰度其實「邊施工，邊生產」，存在極嚴重工業安全隱憂。

報料電郵﹕piano@mingpao.com