指陳鑑林有利益衝突

【明報專訊】高盛「烏輪」事件噚日上咗立法會財經事務委員會嘅特別會議，代表高盛烏輪關注組嘅議員涂謹申出力「鋤」港交所（0388）同證監會係意料中事，不過全場最火爆一幕同烏輪關係不大，就係阿涂同財經事務委員會主席陳鑑林嘅一番唇槍舌劍！

涂謹申噚日一開波就插陳鑑林身為證監會非執行董事，主持呢個會議有利益衝突，要譴責陳鑑林咁話。陳鑑林聽後好勞氣，話事件冇利益衝突，個會亦唔係討論呢樣嘢，叫阿涂唔好糾纏喺呢個話題上。涂謹申愈講愈大聲，雙方互相搶白一輪終於入正題，之後到梁國雄（長毛）議員發言，長毛氣定神閒咁「回帶」，話陳鑑林選擇避嫌唔主持會議會更好，陳鑑林就話更加要主持呢個會以示清白！至此呢個「題外話」才完結。

除咗同主席嗌交，涂謹申仲自爆咗單搞笑嘢，話佢上個禮拜喺馬會嘅「桑拿」撞見兩位證監會前高層，赤條條嘅兩人就同阿涂講一定要跟緊啲烏輪事件，話「否則仲成世界嘅？」嘩！乜講到好似啲蠱惑仔喺桑拿、按摩場所「講數」咁嘅？小琴「呢亭」平民冇入過馬會會所，不過據出入馬會會所嘅上流人士估計，阿涂講緊嘅應該係泳池附近嘅蒸氣房，唔係「桑拿」囉。