無縫綠色記者會 拿林大狀做生招牌

【明報專訊】曾經有「廉署尅星」之稱嘅著名大律師林炳昌，早排加盟咗創業板公司無縫綠色（8150）做主席，公司噚日就用林大狀名義邀請記者採訪，點知成大班記者到場先發現佢原來「no show」，小琴發現佢除咗可以喺法律上幫到公司之外，原來仲可以用嚟做「吉祥物」提供宣傳效果喎。

記者慕名而來 林炳昌唔見影

話說前日無縫透過公關廣發邀請，話「公司主席兼執行董事林炳昌先生就有關收購，誠邀……來我公司參加記者茶會」，小琴同各大報館記者自然以為林大狀會親自現身，於是噚日蜂擁去一睹佢嘅風采，接近20個記者加兩名管理層一齊塞喺約200呎嘅辦公室入面，搞到水泄不通，小琴直情覺得有啲窒息。

窒息唔緊要，小琴去到發現唔見林大狀，第一時間問現場公關「林主席呢？」，點知公關答「邊個林主席？」，搞到要問到管理層先知原來林大狀出咗差，小琴就覺得公司想同記者分享發展係好，不過動用到林大狀做吉祥物嚟吸引記者，最後又無現身，令一眾行家氣餒。