亞視內憂外患 3高層離職

【明報專訊】亞視近嚟內憂外患，一來要諗計迎接3個免費電視牌照、又要處理無綫控告誹謗。內部方面，股東蔡衍明早排告亞視唔公開營運資料，屋漏更兼逢夜雨，近日聽聞亞視有唔少管理層離職。小琴噚日收到一封匿名信，指亞視公司秘書吳宇慧、財務總監梁婉珊、財務部第二把手衛家玉即將離職，搞到鬧人才荒。

封信又話王征搵咗大陸嘅親信何燕江擔任節目部主管，令到部分員工不滿。

信中人指按廣管局規定，亞視節目部嘅主管應由香港人擔任。另外，信中批評王征干預亞視新聞部獨立性，要求新聞部喺4月20日嘅晚間新聞同節目「ATV焦點」，報道亞視不滿無綫收視調查方法。

呢位寫信人冇介紹自己係咪亞視員工，不過佢似乎好熟悉亞視內部運作，佢話王征喺本周二嘅亞視行政例會上，批評「蔡衍明不是男人，竟然去告我嘅堂弟和秘書」、「如果我搞不定亞視，沒有人會搞得定。」寫信人仲話，「亞視各部門嘅主管要坐喺會議室聽佢自吹自擂兩小時，不能說不是一種折磨」。

亞視回應：一般情况都有人手流失

小琴向亞視員工打聽，確認公司秘書、財務總監等人離職，何燕江也加盟擔任管理工作，不過佢係唔係王征大陸親信，就不得而知。至於王征開會有冇發表偉論，小琴睇怕會議紀錄都未必有呢幾項資料。亞視發言人就話，唔評論個別人士離職，又指公司一般情况都有人手流失。至於干預新聞部一事，發言人話完全冇聽過。亞視本周日台慶，睇嚟投資者王征要請同事食番餐，熱鬧一下，公司上下團結，先可以應付到未來嘅挑戰。

報料電郵﹕piano@mingpao.com