恒地紅輪變牆紙

【明報專訊】舊年年中恒地（0012）發紅輪（0879），想用嚟集資250億，眨下眼今日已經係最後交易日，不過噚日股價都只係得51.75元，同個紅輪嘅行使價58蚊仲差一大截，公仔紙形同廢紙。集資夢碎，小琴都戥四叔可惜。隻輪已經跌到落去最低價位1仙，但係噚日仲有1080萬份成交，金額接近10萬大元，莫非有人真係想買來做牆紙？

由3月業績公布之後開始，恒地就多多動作。除咗公開自己重建地盤嘅成本之外，四叔本人增持咗30幾次。最矚目嘅，當然係出100億，未到價就行使個輪，可謂瞓身支持呀。四叔望穿秋水都望佢升到58蚊樓上，等散戶可以兌換紅輪獲利，恒地自己又可以集資，實行一家便宜兩家着。

本來3、4月個股價都升得幾好，最高去過56蚊樓上，可惜之後商品價格急跌令個市掉頭，所以大部分紅輪都未行使。恒地啱啱批咗包括落禾沙等幾個大項目嘅圖則，唔知有冇需要再抽水嚟起樓呢？我哋拭目以待啦。