胡祖六入恒生做非執董

【明報專訊】匯控（0005）同恒生（0011）一向好似兄弟班，勢估唔到連請人標準都有相似地方。恒生噚日宣布，委任被譽為中國「最英俊兼最有紳士風度經濟學家」嘅高盛前大中華區主席胡祖六（Fred）做獨立非執行董事，實行同匯豐亞太區總裁、有「銀行界梁朝偉」之稱嘅王冬勝一較高下。

今年48歲嘅阿Fred ，早年喺清華大學畢業後，就俾政府揀中派咗去美國哈佛大學進修，不過，同選擇回歸中國嘅同期同學樊鋼同李稻葵唔同，阿Fred畢業之後去咗國際貨幣基金組織（IMF）工作，97年加入美資投行高盛做亞洲區董事總經理，之後仲升埋做大中華區主席，直到舊年頭先辭職。

友善無架子 記者like爆

胡祖六嘅同行轉工唔少都去番投行，好似中金公司前首席經濟學家哈繼銘上年辭職加入高盛投資銀行部，摩通中國區首席經濟學家兼研究部主管龔方雄，轉投摩通中國區投資銀行做副主席，但阿Fred離開高盛之後，決定回歸中國搞私募基金，家係春華資本創辦人兼董事長。

小琴聽啲內地記者行家講，阿Fred對人好友善，而且份人無架子，雖然做慣國際投行，但係相信適應充滿本土色彩嘅恒生風格都唔係乜嘢難事，加上佢個樣幾有書卷味，唔少人都相當like佢，內地媒體仲封埋佢做「最英俊兼最有紳士風度經濟學家」。

報料電郵﹕piano@mingpao.com