電視台訪問套餐 15分鐘盛惠36萬

【明報專訊】內地企業競爭激烈，產品要想盡辦法提高知名度，賣廣告係其中一個好方法。不過，有啲企業嘅產品或服務未必適合賣廣告，有啲可以在內地局部落地的電視台，就睇準呢個市場，用另類手法幫企業增加曝光率。

節目女主持人親自致電邀約

小琴有位企業家朋友講，近期一家在內地頗具知名度但以香港為基地的電視台，有節目女主持人親自致電畀佢，問佢有冇興趣接受訪問。主持人話呢個訪問會剪輯成15分鐘播放，電視台收取36萬元。換句話講，呢個其實係廣告。朋友話呢間電視台喺中港兩地播放，形象良好，所以有唔少企業家、商家都有興趣畀錢買呢類訪問。對於一間大企業嚟講，36萬元係細數。賣廣告嘅宣傳味道較濃，但訪問形式較為平實、中立，受訪者可以決定訪問內容，屬於軟性宣傳。

不過企業家朋友話，唔係間間電視台都有號召力，內地企業最關注節目係咪可以喺內地播放，而電視台嘅形象亦要根正苗紅，免得影響企業形象。小琴諗電視台做咁多呢類訪問，其實都會影響形象。