新聞類別
財經
詳情#
【明報專訊】國務院總理溫家寶日前同內地小學生打籃球慶祝兒童節，不過小琴就發現，溫總著住嘅波衫係來自本港上市運動品牌安踏（2020）。總理無意中為安踏做咗最高級嘅代言人，宣傳效果肯定好，相信一般公司畀幾多錢都未必享受到，更唔使講呢個宣傳係完全免費㗎啦！
事緣溫家寶本周二前往北京朝陽區一所小學，與小學生一同上體育堂，隨後更換晒波衫短褲同學生「鬥波」。內地官方電視台中央電視台《新聞聯播》當晚報道呢條新聞時，近3分鐘嘅電視畫面內，多次清晰影到溫總著住嘅波衫印有安踏的公司商標。事後有內地網友將網上拍賣緊嘅一款安踏波衫，同溫總當日所著的作比較，結果的確完全脗合。
公司解畫：純屬巧合
小琴就此特地向安踏查詢，據公司解畫，安踏係中國奧委會嘅合作伙伴，平日一向有贊助開奧委會舉辦的慈善活動，咁啱呢次溫總籃球之行的搞手亦係奧委會，所以安踏的運動裝備自然出現喺活動現場。不過公司強調，溫總著住印有安踏商標的波衫，並非刻意安排，純屬巧合喎。
內地運動服飾市場競爭激烈，近年各生產商為力谷自家品牌，廣告及各類贊助開支逐年加大。小琴翻查安踏2010年年報，呢部分支出達公司銷售額的13.6%，以金額計超過10億元人仔。無論是有心安排或歪打正着，今次有國家領導人為安踏省靚招牌，兼免費獲得全國十幾億電視觀眾的曝光率，相信最開心嘅一定係老闆丁世忠啦！
報料電郵﹕piano@mingpao.com
回應 (0)
