星爺舊角色版權 比高曾擬「回購」

【明報專訊】影壇笑匠周星馳向來搞作多多，自從佢做咗上市公司比高（8220）嘅主席後，就將上市公司搖身一變成為一間多媒體製造公司，小琴最近就聽到消息，話比高欲購回星爺演出嘅電影角色版權，用嚟製作動畫及網上遊戲。不過，之後管理層諗諗吓就覺得唔划算，始終卡通角色邊有星爺真人咁有號召力呀，所以最後放棄呢個方案。

小琴打畀公司執行董事陳昌義，佢同小琴講，今年初公司有內部討論過，如果要做網上或者手機遊戲，有冇需要買回以前電影角色，放落個遊戲度？不過，佢哋討論過之後，認為要用錢買番啲角色版權實在唔划算，倒不如自行再創造角色，皆因只要有星爺嘅blessing，新角色一定會較舊角色好。

其實家嘅電影好多都係由漫畫以及卡通片改拍，好似喺荷李活愈拍愈有的Marvel英雄系列，又或者《變形金剛》咁，不過，由電影角色改造為卡通角色嘅，就比較少有啦。

比高：為網上遊戲 買版權唔抵

陳昌義話，用喺網上遊戲嘅角色全為虛擬，並非真人，所以用錢買下角色版權唔抵，佢仲話，今個月比高就會開拍電影《大話西遊》，入面有好多角色，如果係需要製作遊戲，都會喺呢套戲入面揀出來。

講開電影《大話西遊》，其實即係西遊記，之前就有消息指星爺請到張曼玉演出西遊記，而今次星爺就會兼任監製及攝製導演，比高投資超過1億元人民幣。