中資券商酒會 擺金牛攞好彩頭

【明報專訊】中港兩地股市近年愈來愈親密，中資證券商喺香港亦都愈來愈活躍。香港中資證券業協會噚日4周年誌慶，喺金鐘搞咗個酒會，30幾個會員由銀行、券商、基金到期貨公司都有派員出席，加上一班主禮嘉賓，迫爆會場。不過，成個場最搶眼都係門口嗰隻大金牛，呢排個市「欲升又止」，大家見到呢隻大金牛都撲埋去影相攞番個好意頭。

噚日啲主禮嘉賓來頭唔小，有財經事務及庫務局長陳家強、港交所（0388）行政總裁李小加、行會成員史美倫等等，不過論搶鏡佢哋都輸晒畀商品交易所主席張震遠，小琴指嘅係佢嘅簽名。

話說每位嘉賓都會喺隻大金牛身上簽個靚名，見慣大場面嘅Barry（張震遠）似乎好得女明星真傳，深知咩位最搶鏡，大筆一揮將個名簽喺牛頭上，個個人行過都見到佢個大名。

獨家保薦米蘭站 中資券商影響力增

老實講，呢啲酒會場合雖則話衣香鬢影，但大家講啲嘢來來去去都係客套恭賀說話，新意欠奉。不過香港中國企業協會會長張學武就指出一點，話早排hit爆、刷新超購紀錄嘅米蘭站（1150），正正係由中資證券業協會嘅會員之一 ——招商證券，做獨家保薦人，反映中資券商喺香港影響力日增。言下之意，睇嚟中資券商將來會想同外資行「鍊過」，咁就真係要拭目以待，佢哋嚟緊再有冇好似保薦米蘭站呢啲代表作喇。

報料電郵﹕piano@mingpao.com