張華峰不記仇 讚韋奕禮

【明報專訊】證監會前行政總裁韋奕禮前日離開香港，獲得一班雷曼事主夾道「歡」送，另一邊廂電盈小股東大聯盟就發信感激佢保障小投資者權益不遺餘力。咁一班經常同馬田（韋奕禮之洋名）交手嘅華資經紀又點睇？小琴噚日同資深證券界人士、全國政協張華峰食飯，席間講起馬田，咪以為曾經同證監會有「牙齒印」嘅張華峰會大數韋奕禮不是，佢反而盛讚韋奕禮夠均真添！

曾違規被譴責 罰款250萬

話說證監會舊年以違規到內地「拉客」開戶的罪名，公開譴責張老闆名下嘅恒豐證券，張華峰喺北京出席人大政協會議時，就曾經主動約見中國證監會主席尚福林，希望中證監能釐清香港證券行喺內地做生意嘅問題。

經過一輪爭議，最終證監會向恒豐開出250萬元大洋罰單，張華峰計落證監會查咗單嘢年幾兩年，覺得呢個價錢都好合理。佢又話，當時同證監會可以話係「撐到行」，畀着係中國人阿頭話事，一定會「加多兩錢肉緊」，但證監會處理件事完全冇放私人恩怨落去，讚韋奕禮夠晒均真。張華峰亦都認同坊間說法，由外籍人士出任證監會行政總裁，可以更公平獨立喎。

報料電郵﹕piano@mingpao.com