黃天祐力拒入奸人堅條村

【明報專訊】香港董事學會一年一度嘅傑出董事獎又開始接受提名，香港董事學會主席兼港交所（0388）上市委員會委員黃天祐話，今年主題係實行董事會自我評估，小琴就問黃天祐點睇近排中國民企爆煲爆到喺美國有「黑名單」，佢話只要係好公司，喺邊度上市都唔會登上黑名單，而爆煲民企好多時都係個老闆自己有問題。

要管理層每月交數 遭群起反對

既然係咁，咁民企啲獨立董事可以發揮啲咩作用呢？黃天祐覺得，獨立董事大部分都係專業人士，喺公司爆煲前總有蛛絲馬迹，例如遲遲交唔出盤數、CEO前言不對後語等等，又或者盤數好唔合理、現金流突然大降，點都有迹可尋。

講到呢到，黃天祐就話唔明點解港交所之前諮詢，建議管理層須每月向董事會提交營運報告，遭受咁多人反對，因為呢個做法真係可以令董事更加準確掌握公司營運狀况。除非有上市公司由上級至下級有心隱瞞獨立董事，好似「黃飛鴻入咗奸人堅條村咁」，但相信咁極端的情况好少發生喎。