新聞類別
財經
詳情#
【明報專訊】馬雲創造嘅「阿里巴巴」神話，令佢成為近年中國最出色嘅企業家之一，不過同雅虎（Yahoo）交手一役，為咗保護支付寶而私自將股權轉移，在國際資本市場引起很大爭議，在內地甚有江湖地位的「財新網」總編輯胡舒立，近日都批評馬雲唔尊重產權同契約精神，繼續引來內地不少知名人士喺微博激烈爭論，科網巨人史玉柱、耶魯大學金融學院教授陳志武都參與埋一份，一個話馬雲煽動民族主義，另一個撐馬雲保護國家金融安全，爭論十分激烈。
早排市場傳言雅虎對阿里巴巴（1688）母公司嘅支付寶業務虎視眈眈，已經引起市場爭論應唔應該畀中國重要資產流入外資手上，直到上個月11號，雅虎突然話支付寶股權原來靜靜雞喺2009年同2010年，分兩次轉移咗去馬雲私人擁有嘅一間公司，而佢哋就到今年3月31號先知道件事，當時馬雲就話雅虎「扮晒嘢」，因為件事已經通過咗董事會，佢哋一早就知道。
傳媒學者 齊批欠契約精神
馬雲話晒都係近年中國最成功企業家之一，唔信你去內地書店望吓，有幾多財經類書籍係用馬雲做封面就知，就係因為咁，呢件事喺內地更加哄動，胡舒立早兩日就寫文抨擊變成天使與魔鬼化身嘅馬雲，搞到身在外地嘅馬總都要用短訊同佢「解話」，內容仲編成文章公開。
馬雲強調自己今次咁做唔係搞民族主義，支付寶遲早要對外開放，只係暫時仲未係時候，話自己做事絕對合法、透明同為公司着想。
不過在內地名聲甚隆嘅陳志武教授，批評馬雲唔尊重產權同契約精神，煽動民族主義，仲「暗寸」馬雲太貪，做事不擇手段；不過科網行家、巨人集團董事長史玉柱就力撐馬雲，話支付寶涉及國家金融安全，法規不許外資持有，馬雲完全係用合法手段保護國家資產，一啲問題都無咁話喎。
報料電郵﹕piano@mingpao.com
回應 (0)
