羅兵咸：中國娛樂增長快

【明報專訊】內地經濟增長迅速就係人都知啦，其中娛樂及媒體業務都有唔錯嘅增長，噚日羅兵咸永道公布《全球娛樂及傳媒行業2011-2015年展望》報告，發現中國去年整體娛樂及媒體行業增長13.9%，預計未來5年增長趨勢將持續，2015年嘅年均複合增長率將保持喺11.6%水平，成為增長最快國家之一，亦係全球最大市場。

小琴發現愈來愈多上市公司轉行發展內地嘅電影市場，原來舊年內地電影娛樂業增長53.1%，增速係全球之首，所以香港電影人，由周星馳嘅上市公司比高（8220），到杜sir杜琪峰，都主力攻內地電影業，港產味道嘅電影愈來愈少嘞。另外，到咗2015年，內地廣告收入年均複合增長率將達11.4%，消費者支出預計達120億美元。羅兵咸預料，未來5年電視廣告仍然係主要廣告收入部分，但互聯網就會係最快增長部分。

至於香港方面，娛樂及媒體市場以廣告行業為主要增長動力，大家以為報章電視等傳統媒體會係廣告市場式微？答案係否定嘅，羅兵咸香港娛樂及媒體行業策劃合伙人邱麗婷就話，香港雖然正經歷數碼化年代，但數碼平台不會完全取代傳統媒體喎。