政府考慮沽貿易通 市值1.2億

【明報專訊】呢排個市唔聽話，小琴有朋友都呻話應早早沽貨上岸算數，唔知香港政府係咪都有呢個諗法呢？貿易通電子貿易（0536）公布，話收到政府通知，政府家正檢討喺裏面嘅12.3％嘅持股量，搵緊適當時機減持喎。批貨市值1.2億元，其實好濕碎。

睇返貿易通近期股價表現都唔錯，節節上升，上個禮拜更見過海嘯後高位1.37元，唔知係咪政府都想高價出貨呢？如果政府減持，唔知另一位股東、揸住8.12％股權嘅匯控（0005）會唔會心郁郁跟減呢？

1988年成立嘅貿易通業務主要係提供增值電子商業服務，1992年港英政府加入成為貿易通最大股東，進一步推動貿易電子化，05年公司上市，作為大股東之一嘅政府雖然話係秉持住「大市場、小政府」嘅原則辦事，當年亦講明最後會出售股權，而佢今次亦都會考慮整體市况下，搵個適當嘅時機減持，好快將會搵財務顧問兼協調員，就佢哋家喺貿易通嘅投資策略畀意見。