張茵連日增持 撐玖紙

【明報專訊】內地紙業女王張茵，都算係呢個星期嘅股壇風雲人物，佢間公司玖龍紙業（2689）星期二畀評級機構標準普爾撤銷評級，搞到股價短短半粒鐘就暴跌兩成，其後更停埋牌，令張茵無啦啦唔見咗30幾億身家。不過，今次玖紙嘅危機處理都算迅速，一方面響第二日即時作出澄清，另一方面，張茵仲連續兩日增持，以行動表達對公司嘅信心。

合共購入893萬股

玖紙嘅公關公司噚日就發消息通知，話張茵繼標普撤銷評級翌日（星期三）增持後，又再響星期四增持511.8萬股公司股份。而星期三嗰日，佢先同行政總裁張成飛及財務總監張元福各自分別增持381.4萬股、170萬股及30萬股。換句話說，前後兩日張茵手上的玖紙就多了893.2萬股。

其實除咗增持，玖紙管理層響星期三已經出手反擊，一方面反駁標準普爾，另一方面又改請標普嘅主要競爭對手穆迪投資為第二評級代理，當日復牌後股價反彈一成半。事件仲引來獨立股評人David Webb批評不應讓評級公司在開市期間公布評級變動，證監會亦都講會向標普了解事件，睇來呢場風波輸家誰屬，還有待分曉。

報料電郵﹕piano@mingpao.com