民企股紐約告急

【明報專訊】民企風波愈演愈烈，除咗玖龍紙業（2689）因為評級機構標準普爾話「無法充分接觸管理層」，而被撤銷債務評級外，小琴發現美國上市嘅中國民企亦係眾矢之的，因為中國概念股在美國爆出嘅會計醜聞，令投資者爭相甩掉中資股票。好似喺美國納指上市嘅哈爾濱泰富電氣，股價本周四喺紐約大瀉50% ，成交創紀錄新高，原因係之前Citron研究再度質疑由公司管理層主導嘅反向收購是否可行。

另一隻民企股雙生金生物亦遭納斯達克交易所勒令停牌，原因係審計機構提出嚴重問題，令公司無法如期公布去年度業績，小琴發現，這已經係今年度第13隻被納斯達克停牌的中資公司，代表民企風暴真係好嚴峻。

網股迅雷上市亦押後

已經上市嘅都遭人拋棄，還沒上市嘅想登場都難咗，據知由於市况不佳，中國互聯網平台企業迅雷將會推遲到納斯達克IPO上市。之前美國證交會（SEC）亦都公布，由於公司獨立審計人員突然請辭，決定暫停中國智能照明電氣，以及盛世巨龍媒體傳播，呢兩家中國民企嘅上市計劃。