新聞類別
財經
詳情#
【明報專訊】近日小小超李澤楷旗下電盈（0008）大搞親民騷非常成功，電盈似乎有一番新氣象。小琴發現小小超成個人都好似唔同咗。以往講英文多過講廣東話嘅李澤楷，喺股東會上全程以流利廣東話回答問題，又對小股東嘅態度極親和，表現友善，拿揑得恰到好處，唔知有冇高人在背後指點呢。
小小超為咗顯示對電盈嘅信心，繼續入市增持電盈。據聯交所股權資料顯示，李澤楷於6月14日及15日加碼增持電盈，兩日斥約2546.4萬元入市增持電盈共829.7萬股，持好倉由27.3%升至27.42%。
其中李澤楷於14日按每股平均價3.058元增持490.4萬股電盈，涉資約1499.64萬元，再於15日按每股3.085元增持電盈339.3萬股，涉資1046.74萬元。小小超咁支持，電盈股價昨日都做好，升咗1.9％。
畀面出席旗下報章員工婚禮
唔止咁樣，小琴近日聽到傳媒朋友消息話，甚少出席公開場合嘅小小超，上周五出席咗旗下《信報》一名員工嘅婚禮，在場當然有唔少財經記者，佢都未避忌，畀面觀禮。小小超近年無論公司抑或私人事都有甚多考驗，家成個人好似成熟晒，咁係咪代表電盈小股東守得雲開，就仲要觀察多一陣嘞。
報料電郵﹕piano@mingpao.com
回應 (0)
