里昂：降消費稅 奢侈品受惠

【明報專訊】最近內地一直都醞釀降低消費稅，尤其係奢侈品方面，內地同香港嘅差價可以去到四成，所以小琴嘅內地朋友，聽到呢個消息都覺得好高興，因為唔使再捱貴貨，不過如果兩地差價收窄，就可能影響香港依賴內地遊客嘅零售商。券商里昂噚日就發表咗份報告，話由於降低消費稅嘅關係，長遠睇好內地百貨業同品牌擁有者，多過香港零售業喎。

里昂喺報告話，因為消費稅降低，奢侈品在中國嘅銷售會愈來愈好，而內地百貨公司，好似百盛（3368）同金鷹（3308）咁，都可以受惠。另外，一啲品牌擁有者，例如擁有多個男裝品牌嘅利邦（0891），以及擁有奢侈品牌嘅寶姿（0589）都係選擇之一，因為佢地嘅盈利能力會高啲喎。

另一方面，里昂就指出，降低消費稅對香港零售商一定有負面影響，因為大家差價少咗嘛，里昂提到一啲好依賴自由行客戶嘅公司，例如六福（0590）就有九成港澳區收入都來自大陸遊客，I.T（0999）同英皇鐘表珠寶（0887），都有七至八成香港區收入來自內地客。

內地客愛港售後服務 影響有限

不過，里昂就補充，影響係有限嘅，因為除咗價錢外，內地客仲好鍾意香港優良的售後服務，而且對於有進軍內地嘅香港零售商，負面影響更加少啲。