國美陳曉恩仇 或鬧上法庭

【明報專訊】國美「陳、黃」之爭，難道要鬧上法庭了斷？陳曉5月中接受內地媒體訪問「大爆國美財務漏洞」。事隔個幾月，國美入稟人民法院提出訴訟，要求追究陳曉嘅違約行為及不實言論。負責今次訴訟嘅國美執行董事鄒曉春，正是大股東黃光裕當年「欽點」入國美董事會嘅要員，「陳、黃」呢段關係，認真「難離難捨」。

陳曉曾爆料 國美指言論不實

國美噚日向傳媒發聲明，話陳曉嚴重違反早前與國美簽訂的《協定》，向某媒體發表對國美不真實或誤導的言論，對公司的聲譽、經營活動等造成了經濟損失。國美為了維護公司的聲譽及利益，決定就陳曉合同違約行為及不實言論等行為，追究法律責任。

紛爭因由，要由《21 世紀經濟報道》5月中一篇題為「大爆國美財務漏洞」嘅陳曉專訪說起。呢篇專訪係陳曉退下國美管理層後，首次公開大談前僱主。報道中談到供應商要喺國美賣貨，就要承擔巨額費用，由總部到大區，再到分公司，甚至櫃枱都成為收費點，由於要向各個層嘅領導畀相當數量嘅費用，令國美嘅貨品價格特別高。篇故仔仲話，國美唔顧一二線市場已經飽和，提出新開480家分店嘅計劃完全係「賭氣」。

不過，報道出街之後，陳曉已經急急澄清，話報道斷章取義，唔代表佢嘅觀點，仲喺微博上面話， 「我做過國美的主席，現在也是國美的股東，對國美有很深的感情，是不會做對國美不利的事情的。」究竟呢場愛恨交纏嘅「國美恩仇錄」將如何了斷？

報料電郵﹕piano@mingpao.com