【明報專訊】小琴覺得，白手興家嘅富豪固然有值得敬佩之處，但係啲富二代或者富三代，老實講唔少真係會令人搖頭嘆息，所以當小琴發現，嘉華國際（0173）主席呂志和嘅孫女、銀河娛樂（0027）副主席呂耀東大女Joanna喺灣仔君悅酒店企門口做「接待員」，簡直令小琴刮目相看！
話說銀娛噚日喺君悅搞股東會，事後呂志和同呂耀東步出君悅大門，一位一直企喺酒店大堂嘅年輕女職員，就負責招呼兩位呂生出門口。小琴見到兩位呂生同呢位女職員有講有笑，引起咗好奇心，經了解後先知道，原來呢位甜姐兒就係呂耀東嘅囡囡！
殷勤為小股東遞雨傘
送完兩位呂生之後，Joanna繼續企喺大堂為其他客人服務，小琴親眼目睹佢為一名相信係剛出席完銀娛股東會嘅小股東遞上雨傘，工作態度一啲唔馬虎。小琴即刻上前想話問吓佢，點解會嚟君悅做「企堂」，但係Joanna就好有禮貌咁話，佢喺工作時間唔適宜傾私人嘢。
其實呂耀東近年主要搞銀娛亦即係賭業加酒店，嘉華旗下酒店亦遍佈世界各地，佢囡囡去酒店工作，為將來打理家族生意作準備都好合理。只係Joanna選擇喺君悅，而唔響集團旗下酒店實習，就有啲令人意外。銀娛嗰邊對於Joanna喺君悅打工呢件事話冇乜可以補充，相信係希望低調處理，好切合佢哋家族一貫踏實嘅風格。
呂耀東曾經同人講過，佢呢位掌上明珠，好有愛心，大學畢業後一心想做Miss春風化雨，但係一如好多富二代，Joanna被要求去投資銀行工作。試咗一年，仍然覺得自己無興趣從事金融業。至於身為父親嘅呂耀東，又點樣說服愛女投身酒店服務，日後為家族生意出力，小琴就不得而知。
比起唔少富二代富三代只顧出入波場，Joanna直情係異類，而佢生於大富之家，都願意日日企喺酒店門口招呼客人，比起依家好多身嬌肉貴嘅「港孩」更肯捱，下次真係要訪問吓呂耀東點樣教小朋友，為香港啲「怪獸家長」指點迷津。
報料電郵﹕piano@mingpao.com
