JOYCE好在無私有化

【明報專訊】好多大股東成日想將啲上市公司好嘢私有化，小股東真係要打醒十二分精神，即使獨立董事同埋財務顧問話好，都咪輕易信，近年最佳例子莫過於JOYCE（0647）。

九倉（0004）老闆吳光正上年初想用每股2毫子私有化JOYCE，以吳天海為首的JOYCE董事會，以及李福全等獨立非執董，仲有向獨立董事提供建議的財務顧問百德能，都向小股東推薦接受吳光正的2毫子出價。公司當時仲自己踩自己，話「2008年後期爆發全球金融危機導致經營環境困難」及「未來數季零售市場前景充滿挑戰」。

吳光正去年開價2毫 至今升值4倍

事後孔明，一年過去，唔單止公司盈利升咗近3倍，股價升得仲多，噚日收市價1蚊，足足係私有化價格的5倍！

JOYCE噚日公布截到2011年3月底止業績，純利勁升2.7倍到1.3億，創歷史新高，每股盈利有8.2仙，用噚日收市價1蚊計返，歷史市盈率即刻由45倍大幅跌到12倍，當日個私有化作價市盈率就只係得可憐嘅2.4倍。錢賺多咗，公司末期派息都手鬆咗，每股派多3倍到4仙，揸住11.83億股嘅吳老闆就淨袋4735.4萬股息。

講返私有化單嘢，響私有化前用約莫7000萬賣晒手上股份畀老吳嘅馬景華夫婦，就肯定係大輸家。用噚日JOYCE收市價1蚊計，嗰批股份市值已經差不多3.52億，即係佢兩公婆帳面少賺2.8億，加埋呢次業績嗰1400萬股息，一年多啲就差成3億，你話係咪喊都無謂！

報料電郵﹕piano@mingpao.com