新聞類別
財經
詳情#
【明報專訊】幾日前再次抱孫嘅恒地（0012）主席李兆基（四叔），喺公開場合講咗幾句對港股嘅心得。但係幾日後佢老人家睇番報道，話唔係咁嘅意思，特登叫發言人打電話嚟話畀小琴知，免得投資者聽到做錯決定。
原本各大傳媒出街嘅版本，係話如果恒指由24000點跌一成（21600點）嘅話，四叔佢就會增持，再跌一成（19440點）就會減持。但恒地發言人Bonnie話，應該係四叔預期港股短期內走勢將會呈上落市格局，以24000點為中線，升一成（26400點）就會減持，跌一成（21600點）就會增持至真。
咦？佢老人家今個月初喺美麗華酒店（0071）先話過，恒指喺23500點上落，起又係一成、跌又係一成，無大作為。個市喺6月跌得咁慘，四叔反而將恒指嘅「目標」調高500點？
目標較月初提高500點
或者佢真係對個市好有信心，怪唔得佢單喺呢個月，都已經增持咗自己公司股票成10次咁多啦。
李家千億媳婦徐子淇上個禮拜終於生咗佢嘅第一個男嬰，真係可喜可賀，相信四叔都笑到見牙唔見眼啦。既然個市上上落落都冇肉食，不如花多啲時間同幾個孫仔玩好過！
報料電郵﹕piano@mingpao.com
回應 (0)
