新聞類別
財經
詳情#
【明報專訊】獨立股評人David Webb，小琴平時見佢評股都係彈多過讚，不過其實佢都有唔少愛股，特別係佢至愛嘅工業股，現時佢持股超過5％嘅8隻股票入面，其中7隻都係工業股。不過，噚日佢嘅愛股之一、持股一成嘅亞倫國際（0684），就因為盈利倒退加上減派息，股價大跌超過15％。
亞倫國際去年純利跌咗14%至1.6億元，係過去兩年來首次倒退，每股盈利48.6仙，末期股息按年減近17%至15仙，令股價收市大跌15％至3.11元。
David Webb喺1999年起兼任「股壇聖誕老人」，每年12月初會喺網站上薦股，多年來「送」過愛高集團（0328）、成謙聲匯（2728）及順龍控股（00361）等股份。Webb所薦之處，股票表現良好，最後一次推薦嘅愛高，翌日曾大升23%。不過Webb於前年已經金盤洗手啦。
根據聯交所數據，David Webb現時持有逾5%股權嘅股票有8隻，不過股價表現就認真麻麻。8隻股份入面有7隻，由今年頭至昨日，都係要跌，其中持股7.01％、製造電子產品嘅成謙聲匯今年就跌咗45％，另外持股7％、製造嬰兒產品的隆成（1225），就跌咗逾17％。
今年僅包浩斯有斬獲
至於邊隻股份今年有升勢？答案係唯一一隻非工業股包浩斯（0483），Webb持有5.03％嘅包浩斯，藉着業績理想，加上零售市場暢旺，係外圍跌市下今年都有5％以上升幅。就嚟又到半年結嘅時間，睇嚟Webb都要好好檢視下自己嘅portfolio啦。
報料電郵﹕piano@mingpao.com
回應 (0)
