許家印帶大班人馬 上黑龍江搵食

【明報專訊】恒大地產（3333）的清遠世紀旅遊城剛剛開幕，主席許家印就同新世界（0017）以及華人置業（0127）一眾管理層即奔赴黑龍江考察。所謂禮尚往來，上周末彤叔（新世界主席鄭裕彤）同埋大劉（華置主席劉鑾雄）友情客串，坐鎮恒大清遠項目開幕禮，烈焰下坐足1個鐘，幾日之後，許家印去黑龍江搵食，自然不會不記得兩位友人。

許家印同呢班大孖沙的交情始於恒大上市。當時大劉、彤叔勁撐恒大，但入股條款亦都勁辣，結果許家印要自掏腰包賠12億畀佢哋。

早前，恒大將啟東一地塊，以每平米樓面4000幾元人仔作價賣畀大劉，總算向當年將地塊價值計算為零的分析師吐一口烏氣。大劉最後時刻入資，樂於坐享其成。

今次彤叔、大劉均派出手下大將跟隨許家印北上搵食，包括新世界中國地產執行董事方承光、華人置業中國業務部主管江志明等。這一行人也受到當地最高規格的接待，黑龍江省省長王憲魁，哈爾濱市委書記蓋如垠都親自出馬。小琴心諗，家內地市場愈來愈難做，我哋香港人如果不靠住內地關係，全憑自己闖一番天地，談何容易。