兩中資券商快招股 賓架要先「夾口供」

【明報專訊】小琴噚日同投行賓架朋友食飯，自不然講開近排個新股市場，上半年香江新股唔爭氣，大家都寄望下半年嚟個反彈，話晒有啲內銀、中資券商排隊嚟上市，應該可以搞旺返個場。

不過，一講起中信證券同海通證券兩大中資證券股，賓架就有啲頭痕，因為今次係首輪真正中資證券行嚟香港搞上市（依家上咗市嗰啲中資背景證券行，唔包括佢哋喺內地嘅業務），而且兩間公司嘅上市時間相當接近，賓架同埋律師寫招股書嘅時候，嗰啲行業概覽、風險因素方面，如果兩間公司描述嘅內容相去甚遠，恐怕好難同監管機構同埋投資交代。

內容差距遠難交代

唔想咁樣，可以點樣呢？賓架朋友話，呢啲嘢好難靠默契或者心靈相通，唯一辦法就係兩路人馬溝通吓，即係名副其實咁「夾口供」，好過大家估估吓，結果本招股書出到嚟，兩間公司啲行業概覽南轅北轍，一個大力唱好一個保守，到時就俾市場質疑，係咪有人誇大其辭了。